Alonso presiona aos seus traballadores na cea da empresa e fai campaña por Dieste, a súa marioneta

O Consello local do BNG de Boiro diante das declaracións efectuadas polo Sr. Alonso, presidente de Jealsa-Rianxeira, manifesta o seguinte:

1. O grupo de empresas da familia Alonso é unha peza clave para a economía e o emprego de Boiro e do noso país. Jealsa é a empresa máis importante da nosa vila -aínda que non a única- grazas á familia Alonso e a moreas de familias máis cuxos membros se esforzan cada día traballando nesa fábrica.

2. Jealsa funciona ben debido aos seus impulsores e debido tamén á forza de traballo de moitas mulleres e homes que madrugan cada día para traballar alí. Desde o Concello de Boiro sempre se apoiou e se apoiará a Jealsa-Rianxeira para que continúe coa súa actividade moitos anos, sempre, claro está, que CUMPRA COA LEGALIDADE, porque non se pode apoiar ao Sr. Alonso e ás súas empresas a calquera prezo.

3. Calquera persoa é moi libre de manifestar a súa opión sobre o goberno bipartito de Boiro, e iso é algo moi respectábel que, desde está o BNG, pódese facer libremente. Todo o mundo recorda o periodo no que o Sr. Alonso era alcalde en Boiro porque esa “suposta liberdade” non existía xa que até as paredes tiñan oídos. Parece que voltan os vellos tempos.

4. O Sr. Alonso, agora como antes, estase aproveitando da súa situación de superioridade como empresario para coaccionar aos seus traballadores a que escoiten o que el quere e a condicionalos para que tomen partido polo PP, e isto non o fai nun mitin senón no ámbito da súa empresa. A gravidade das palabras do señor Alonso non son polo que di senón por onde o di: é inevitábel que os traballadores sintan medo polo seu futuro se non fan o que se lles “aconsella”. El sábeo moi ben e aproveitase dun xeito obsceno da súa posición de superioridade.

5. É triste ver que unha persoa que foi alcalde non respecte os principios da DEMOCRACIA e ameace con abandonar Boiro se os resultados dunhas eleccións libres e democráticas non lle gustan. Esas palabras só se poden entender desde unha mente moi pechada e desde a súa propia ambición persoal.

6. Estamos vendo que é un perigo que unha soa persoa chegue a posuir o poder absoluto dunha vila: o poder político e o poder económico, tendo a capacidade de condicionar por completo a vida de tanta xente porque iso propiciaría unha autentica ditadura.

7. Dieste non é máis que a marioneta que Alonso ten para manexar Boiro ao seu antollo. Dieste é empregado de Alonso, a quen lle vai facer caso cando haxa un conflito con Jealsa aos traballadores ou ao seu xefe? Ao seu xefe ou á cidadanía de Boiro? Quen vai gobernar en Boiro realmente? Se o que vai gobernar é o Sr. Alonso que non nos mintan desde o PP e que o presenten ás próximas eleccións. Nós non lle temos medo ao debate político.

8. No BNG referendamos que a mellor opción de goberno en Boiro é Xosé Deira porque é a persoa que aglutina maiores consensos dentro da cidadanía ao tempo que representa á perfección o proxecto transformador do BNG. Deira non está supedidato a ningún interese económico nin persoal.

P.S. podes consultar as declaracións de Alonso en:   

http://www.lavozdegalicia.es/barbanza/2010/12/24/0003_8928353.htm

Xosé Deira continuará ao temón do BNG

O mandatario nacionalista repetirá como cabeza de cartel nas vindeiras eleccións municipais co obxectivo de revalidar o goberno en Boiro.

A asemblea do BNG de Boiro confía unha vez máis en Xosé Deira para encabezar o proxecto do nacionalismo en Boiro. Ademais a asemblea valorou moi positivamente o traballo desempregado tanto polo alcalde como pola actual equipa de goberno e agarda incrementar os apoios da cidadanía para conseguir ser o partido máis votado do concello, posto que nos anteriores comicios se quedou a tan só 12 votos dese obxectivo. O BNG parte coas mellores expectativas de goberno, neste caso.

Xosé Deira é a persoa que aglutina maiores consensos dentro da cidadanía ao tempo que representa á perfección o proxecto transformador do BNG. O noso candidato é a mellor opción porque reúne carisma, capacidade de diálogo e xestión, e non está supedidato a ningún interese económico nin persoal. Iso, xunto coa equipa que estamos deseñando, será a garantía de liderado do BNG e faranos medrar en apoio e implantación entre a cidadanía.

Os froitos de oito anos de goberno nacionalista están á vista porque desde que está o BNG se goberna doutro xeito: transparencia absoluta no funcionamento da administración, contacto continuo coa cidanía, control exhaustivo do gasto (uns hipotecaron o concello e outros agora pagamos) e inversións pensando nas persoas e nas clases mais desfavorecidas: galescola, centro de día, praza de usos múltiples, iniciativas locais de emprego, etc. Por iso o mandato do BNG pódese resumir en transparencia, participación e cidadanía.

Igualmente o BNG de Boiro quer manisfestar que o actual contexto político é moi favorábel para que a frente nacionalista entre no goberno dos catro concellos da nosa comarca e anima a todo o mundo a apoiar esta oportunidade histórica.

1º acto da lei de augas en Cespón. Paremos a suba de impostos do PP

O BNG é a única alternativa real ante a crise. O que está facendo o PSOE é o mesmo que faría o PP

CONSIDERACIÓNS DO BNG SOBRE AS POLÍTICAS DO ESTADO FRENTE Á CRISE ECONÓMICA

O BNG COMO ALTERNATIVA ANTE AS POLÍTICAS DE DEREITA E O NOVO ATAQUE DO GOBERNO DO PSOE AO ESTADO DO BENESTAR



     

AS ÚLTIMAS MEDIDAS DO GOBERNO DO PSOE (privatización dos aeroportos, eliminación da axuda de 426 euros aos desempregados, redución do imposto de sociedades) SON POLÍTICAS CLARAMENTE DE DEREITA.

RAJOY DEBERÍA ESTAR APLAUDINDO COAS ORELLAS. SE NON O FAI É PARA FINXIR QUE CONTINÚA NA OPOSICIÓN.  

EN REALIDADE, O QUE HAI É UN GOBERNO DE COALICIÓN NA SOMBRA. O MÁIS HONESTO É QUE EMERXESE Á SUPERFICIE.   

   

O MÁIS HONESTO É QUE OS PARTIDOS QUE ACEPTAN A PRIMACÍA DOS MERCADOS SOBRE A POLÍTICA GOBERNASEN XUNTOS E NOS DEIXASEN A OPOSICIÓN A AQUELAS FORZAS POLÍTICAS QUE ESTAMOS POR QUE A POLÍTICA GOBERNE OS MERCADOS.    

 

AS MEDIDAS SON ANTISOCIAIS E ANTIECONÓMICAS.  

PRIVATIZACIÓNS SEN PRECEDENTES: O ÚNICO QUE FALTA POR PRIVATIZAR É XA O PROPIO GOBERNO.  

ANTISOCIAIS: O RETALLAMENTO DAS AXUDAS AOS PARADOS.  

ANTIECONÓMICAS: RECÓRTASE O IMPOSTO DE SOCIEDADES, CO CAL SE INCREMENTARÁ O DÉFICIT, SEN NENGUNHA GARANTÍA DE CRIACIÓN DE POSTOS DE TRABALLO. POR CERTO, HAI QUE LEMBRAR QUE A SISTEMÁTICA REDUCIÓN DO IMPOSTO DE SOCIEDADES É UN DOS FACTORES QUE PROVOCOU A CRISE IRLANDESA. 

    

O GOBERNO CONTINÚA PASÁNDOLLE A FACTURA DA CRISE AOS  TRABALLADORES.  E SEGUE SEN ACOMETER AS REFORMAS QUE SI SON URXENTES E QUE SI SON A CHAVE PARA SAÍR DA CRISE CON XUSTIZA SOCIAL:    

-A REFORMA FISCAL, NUN SENTIDO PROGRESIVO.     

-A REFORMA DO SISTEMA FINANCEIRO, PARA DESDE O CONTROL PÚBLICO GARANTIR QUE A LIQUIDEZ QUE EXISTE NO SISTEMA FINANCEIRO NON VAIA PRIORITARIAMENTE A XOGAR NO CASINO DA DÉBEDA PÚBLICA E SI A FINANCIAR A ECONOMÍA PRODUTIVA.  

   

SE A BANCA PRIVADA OPTA POR DESTINAR OS SEUS FONDOS A COMPRAR DÉBEDA E NON A FINANCIAR AS EMPRESAS E AOS PARTICULARES, NON QUEDA OUTRA QUE CRIAR UNHA BANCA PÚBLICA. ESA É A LIÑA QUE HAI QUE COLLER. O GOBERNO COLLE XUSTO A CONTRARIA: PRIVATIZA E BANCARIZA AS CAIXAS DE AFORRO.     

O PP de Boiro non se entera e chega tarde coas reparacións do Centro de Saúde do Saltiño

 O PP de Boiro non se entera e demandoulle ao goberno municipal que lle pida á Xunta unha axuda para reparar o ambulatorio do Saltiño despois dos desperfectos ocasionados polo tornado, cando xa hai tempo que se lle solicitou á Consellaría de Sanidade.

Chama a atención tanto a descoordinación do grupo municipal do PP de Boiro cos seus "colegas" da Xunta como o pésimo funcionamento que está detectando ultimamente na Xunta, que non é capaz nin sequera de dirixir as reclamacións ao departamento competente.

O BNG aproveita para lle dicir á Xunta que se deixe de excusas e de marear á xente e que se poñan a traballar dunha vez para reparar os desperfectos. E ademais queremos recordarlle á señora conselleira de Sanidade, Pilar Farjas, que deixe de escorrer o bulto e se faga cargo dunha vez dos servizos de mantemento e persoal do Centro de Saúde, que están sendo pagados polo concello cando os debera pagar a súa consellaría.

P.S. A continuación reproducimos a nota de prensa sacada polo Concello de Boiro a raíz deste tema.

 "O Concello ten asinado desde abril de 2009 o convenio co Sergas para que asuma os gastos de mantemento do centro de saúde

O Concello de Boiro esixe á Consellería de Sanidade que asuma as súas obrigas conforme ao Pacto Local

Boiro,  1 de decembro de 2010.  O Concello de Boiro ten asinado, desde o 1 de abril de 2009, un convenio co Servizo Galego de Saúde (Sergas), organismo dependente da Consellería de Sanidade, para  a cesión do Centro de Saúde do Saltiño, conforme o acordado no Pacto Local, e se faga cargo así dos gastos de mantenemento do mesmo.

A Consellería de Sanidade leva un retraso considerable no cumprimento deste pacto, polo que o Concello de Boiro leva dous anos asumindo dita cuantía económica, relativa ao custe do persoal (limpeza, conserxería, etc.), lavandería, calefacción, alumeado e outros gastos, cando estes corresponden á Xunta de Galicia.

O goberno de Boiro leva enviado varios escritos á Conselleira de Sanidade, Dona Pilar Farjas Abadía, para coñecer cales son as previsións da Consellería de asunción destas competencias, sen que ata a data, e pese á insistencia, trasladara información algunha ao respecto, co conseguinte perxuízo para as arcas municipais.

Hai uns días, como consecuencia do tornado rexistrado no Saltiño, o Centro de Saúde sufríu unha serie de danos. A este respecto, o mércores día 24 de novembro, mediante escrito oficial, o Concello de Boiro traladou información sobre estes desperfectos a D. Javier Ventosa Rial Director Xerente da Xerencia de Atención Primaria de Santiago, no que se solicita á Consellería que actúe canto antes para arranxalos, xa que se trata de danos estructurais que sobrepasan ás competencias de mantemento que, ata o de agora, ten asumidas o Concello de Boiro (achégase copia da carta enviada).

Por todo o exposto, este goberno agradece a preocupación que o voceiro do Partido Popular de Boiro, D. Juan José Ortigueira, ten polo arranxo do Centro de Saúde, mais o Concello xa ten solicitado a reparación do ambulatorio e non só iso, senón que a través de numerosos escritos se lle requeriu ao Sergas que cumpra co convenio e se libere así ao Concello de facerse cargo duns gastos que non son da súa competencia. En todo caso, tamén o empraza a que teña a mesma insistencia ante a Xunta para que asuma a súa responsabilidade e se faga cargo do Centro de Saúde."